1Jo 5 | MMX | STEP | Do tara i nuunu do ne Iesu neni Lanarong at ne Moroa, i lox asuusu i do i ruuna ka vam livipisik amaxat at lorooro ren keneng at ne Moroa; la do tara i balamu ne Temen, i balamu bok limixin at ne Moroa.

1 John 5

Limixin At Ne Moroa Di Los Kimit Laxakapmek

1 Do tara i nuunu do ne Iesu neni Lanarong at ne Moroa, i lox asuusu i do i ruuna ka vam livipisik amaxat at lorooro ren keneng at ne Moroa; la do tara i balamu ne Temen, i balamu bok limixin at ne Moroa. 2 Do tara i balamu ne Moroa la i ronga res at levelinga ren, i lox asuusu i do neni i balamu limixin at ne Moroa. 3 Do nedik ta ronga res at levelinga ren, i lox asuusu i do dik ta balamu ne Moroa. La noxo lolos tinedik kusu tana mumu asu levelinga ren. 4 Do tara i ruuna ka vam livipisik amaxat at lorooro ren keneng at ne Moroa, i lox asuusu i do neni ira on basinge vam leveloklok at na lavatbung menemen. Do tara i nuunu at ne Iesu, na i lox asuusu i do neni ira on basinge vam loklok at na lavatbung menemen. 5 Nege i epovo kusu na los kimit loklok at na lavatbung menemen? Neni xusuk mun laradi i nuunu dola ne Iesu neni Nitna ne Moroa.

6 Iesu Karisito ga si boro vana at laxalibet la lempanga loklok katling ga rupot ti lox asuusu i do neni ne Nitna ne Moroa. Ladan ga ru katling lesep susu at ne Iesu la lada ga ru katling lanmet teren. Ni goxo lok ka mun lesep susu, ketla neni ga met bok. La Loroonan Kaala i tong asu i do ne Iesu neni ne Nitna ne Moroa la i epovo do ata siam ka levelinga ren atla levelinga ren i ruturun. 7 Kerepmo na lavantun lempanga i lox asuusu i. 8 Ni Loroonan Kaala, ladan, la lada; la na lavantun axap di lox asuusu leges avanga mun. 9 I epovo dik ta nuunu at levelinga at taradi, ketla levelinga at ne Moroa i mumuat aleng ti mo levelinga, mila neni levelinga mumu ne Nitna. 10 Do tara i nuunu at ne Nitna ne Moroa, neni i ruuna ka vam mo levelinga keneng at lorooro ren. Do tara kopmen na nuunu at ne Moroa, i lok ne Moroa ngan laradi xaxarang, atla ni kopmen na nuunu ap mo levelinga ne Moroa ga vaase i mumu ne Nitna. 11 Mo levelinga i lok keretna, Moroa ga raba vam dik mi lorooro avolo, la langas ti mo lorooro i nemen at lekngen ne Nitna. 12 Dola tara i nuunu at ne Iesu, i ruuna ka vam nom lorooro. Do tara kopmen na nuunu at ne Iesu, ne Nitna ne Moroa, neni noxo ruuna ka nom lorooro.

Lorooro Avolo

13 Nia a malagan na lempanga rinemi mi nuunu at laasen at ne Nitna ne Moroa kusu mina xasep do mira ruuna ka vam lorooro avolo. 14 Nedik taklen tuturun i do dik ta epovo na vosiga ne Moroa, neni i ronga dik mo do dik ta sing ti lempanga i epovo at lavavara ren. 15 Nedik ta xasep pam do ne Moroa ing tonga levesingising atdik, kuren la nedik ta xasep bok do neni im taba dik mi mo lempanga ta ngising tin.

16 Do tara na ven neton na lok laxakapmek, la mo laxakapmek kopmen na lolos kusu tara naba seeve ren; neni na sing ti ne Moroa, la ne Moroa naba raba i mi lorooro. Nia a paase mumu nom limixin di lok laxakapmek la di noxo seeve ren. Ketla lara laxakapmek mo, do limixin dina lox i, dinaba seeve mu i. ^{▼▼Tinedi di vas gasinge ne Moroa la di sok tixirixes kepe rinotno i.} Nia xopmen na paase mi nom. 17 Do tara na lok lempanga kopmen na mokso, ni i lok laxakapmek; la leveloklok kakapmek mo, do tara na lox i, neni noxo seeve ren.

18 Nedik takleklen i do mo tara i ruuna ka vam livipisik amaxat at lorooro ren keneng at ne Moroa, neni noxo lok bok ba laxakapmek. La ne Nitna ne Moroa i lok tatao i kusu laradi kapmek ne Satan noxo lok kapmex i. 19 Nedik takleklen i do nedik limixin at ne Moroa, la limixin at na lavatbung menemen kopmen dina nuunu at ne Iesu Karisito, di nemen maxopok at lololos at laradi xapmek, ne Satan. 20 Nedik ta xasep bok pam keretna, ne Nitna ne Moroa ga rupot la ga raba vam dik mi laxasep, kusu nedik tabakleklen ne Moroa, neni laradi ruturun. Nedik dik lok at ne Moroa i ruturun la at ne Nitna, Iesu Karisito. La ne Moroa neni lavasuun at lorooro avolo.

21 Luvutnuruk orong, mina lok tatao nimi basinge lempoovo moroa. I ruturun.